World Tourism Day hi September ni 27 a ni a, kumin hian Inrinnia a tlak avangin September ni 26-ah lawm niin, thupui atan ‘Tourism and Sustainable Transformation’ hman a ni.

Khuallian  Lalnghinglova Hmar chuan thu sawiin, sawrkar hmalaknate leh hmachhawpte bakah khualzin veivak pun dante a tarlang a. Kum 2024-2025 chhunga khualzin za zela 139.50%-a an pung chu lawmawm a tih thu leh Tourism Department leh tourist service operator-te inpekna rah a nih thu a sawi a.

Minister chuan Mizoram sawrkarin tunhnaiah khualzinte hip nan nasa takin hma a la tih leh kum 2026 atangin festival/event langsar kan neihte awmze nei zawka kalpui a, Tourism Calendar mumal tak duan a ni tih a sawi a. Mizorama khualzin hip thei hmun mawi leh tlawh chakawm engemawzat chu thawmthata cheimawi mek zel niin, state budget pawn atangin project engemawzat kalpui mek a ni, a ti.

Nakkum atangin horticulture  lam hawia Anthurium Festival kalpui tan a nih dawn thu leh hmun nghet, Reiekah, hun nghet October kar hmasa bera hman a nih thin tur thu a puang bawk a ni.

Tourism Minister chuan agro-based tourism, ecotourism, community-based tourism a pawimawh rualin kan ram leilung mawina leh hnam zia pholan nan leh kan local economy than chak nan rel hmanga inkalpawhtawnna thar kan neih hman tangkai a ngaih thu a sawi.

"Hmathlir neia concert economy leh film policy changtlung ngaihven a ngai," tiin kan thenawma hnam dangte nena inthlunzawm a pawimawh a,  kan hnam zia, mikhual chunga tha thin hnam kan nihna chawilian leh a, mikhualte tlawh chak ram kan nih theihna turin, Mizo economy siamthatna hmanrua atana tourism hmang tangkai turin kalkhawmte a chah bawk a ni.